A UNED de Lugo e Aural Centros Auditivos clausurarán esta tarde con gran éxito a primeira edición do Curso de Audioloxía Básica, unha actividade formativa que reuniu a máis de vinte profesionais e persoas interesadas no ámbito da audioloxía e da saúde auditiva.

A formación, desenvolvida entre os días 18 e 20 de maio nas instalacións da UNED Lugo, contou cunha excelente acollida por parte do alumnado participante, que destacou especialmente o carácter práctico das sesións, a calidade das intervencións e a oportunidade de achegarse ao funcionamento da audición e ás principais técnicas de avaliación audiolóxica da man de profesionais especializados.

Ao longo das tres xornadas abordáronse cuestións relacionadas coa anatomía e fisioloxía do oído, os distintos tipos de hipoacusias, as probas audiolóxicas en adultos, a detección precoz da sordera infantil, así como solucións audioprotésicas e experiencias prácticas de audioloxía.

O curso contou coa participación de:

• Miguel Mayo Yáñez, doutor otorrinolaringólogo no Hospital CHUAC. 
• Juan Antonio Vizcaíno Atienza, formador en Audioloxía de Aural Centros Auditivos. 
• Mónica Eiras Lodeiro, formadora en Audioloxía de Aural Centros Auditivos. 

A sesión de clausura terá lugar esta tarde cun bloque centrado en prácticas de audioloxía e experiencias reais, no que o alumnado poderá coñecer de maneira aplicada o funcionamento do audiómetro e da impedanciometría.

Con esta iniciativa, a UNED Lugo continúa reforzando a súa aposta por unha formación especializada, práctica e conectada co tecido profesional e sanitario, promovendo actividades que achegan coñecemento útil e actualizado á sociedade.